Fleire mista jobben på grunn av medikamentsvinn
I 2008 mista 37 autorisasjonen på grunn av rusmisbruk. Det er ei dobling frå året før.
I 2008 mista 37 autorisasjonen på grunn av rusmisbruk. Det er ei dobling frå året før, skriv NRK Sogn og Fjordane.
Les og: Ambulansetilsett mista autorisasjonen
- Det er ikkje kultur for å ta dette temaet opp i helsevesenet, seier Hilde Nicolaisen.
Då ho arbeidde som sjukepleiar rusa ho seg ved å stele medisin frå sjukehuset der ho arbeidde.
Nulltoleranse
For medikamentsvinn ved norske sjukehus fører kvart år til at helsepersonell mister arbeidet og autorisasjonen sin. I fleire av sakene ligg det personelege tragediar bak.
Helsevesenet har svært strenge reglar for medikamenthandtering. Men likevel klarte heile 63 personar som arbeidde i helsevesenet å stele medisin i 2008.
- Det er eit svært alvorleg problem som vi har nulltoleranse for. Men det har vore eit problem så lenge eg har arbeidd i helsevesenet, seier fagdirektør Hans Johan Breidablikk i Helse Førde.
63 mista autorisasjonen
Tal frå helsetilsynet viser at 63 helsearbeidarar miste autorisasjonen i heile landet i 2008, 37 av desse på grunn av rusmisbruk.
Året før miste 17 helsearbeidarar autorisasjonen på grunn av rus. Altså vel ei dobling på eit år.
Hilde Nicolaisen arbeider no i rusmisbrukarane sin interesseorganisasjon, RIO og ho har fått tilbake autorisasjonen sin.
Vanskeleg å unngå
Breidablikk seier det er vanskeleg å unngå at nokon misbruker stillinga si.
- Vi må prøve å unngå at helsepersonell tek medikament og i verste fall rusar seg på dei.
Neste fredag vert det derfor arrangert eit seminar med medikamentsvinn som tema på sentralsjukehuset.
- Målet med seminaret er å diskutere problemet og å kome fram til ein sikrare måte å handtere medikament på. Det ligg mange forslag regionalt på ei rekkje tiltak som kan setjast i verk. Nokre av desse er svært kostbare og vil ta lang tid å innføre. Men det er tiltak som vi kan setje inn om ikkje så lenge, seier Breidablikk.