Vaksinerte heile helga

Fredag kom 2000 dosar med vaksine mot svineinfluensaen til Stord. På dei fire sjukehusa i Helse Fonna er det køar med tilsette som skal vaksinerast gjennom heile helga. På Stord sjukehus tok assistentlegen Bjarte Wilhelmsen velvillig imot sprøytestikket.

Mindre skeptisk
– Folk har alltid vore skeptisk til vaksinar, men eg trur likevel at dei fleste av kollegaene mine vel å gjera det no. Eg vel å stola på det myndigheitene seier, fortel han.

Legen måtte stå i kø i rundt 30 minuttar før han vart kalla inn på kontoret til sjukepleiar Solveig Steinsland laurdag.

Fredag tok rundt 80 tilsette imot vaksinen. Laurdagen heldt det fram med like mange.

HR-direktør i Helse Fonna, Helga Onarheim, oppfordrar alle dei 3.200 tilsette om å ta vaksinen, på lik linje med det helseminister Anne-Grethe Strøm-Erichsen påpeikte før helga.

– Dette er eit tilbod som alle kan nytta seg av. No har me delt dei tilsette opp i tre grupper. Først ut er ambulansepersonell, laboratoriepersonell, røntgen og barneavdelinga. Dernest kjem resten av det kliniske personellet, før me tek for oss alle dei andre tilsette, seier ho.

I veka sa ein av fem at dei ville nytta seg av tilbodet. Men dette har auka etter at saka har fått endå meir merksemd i media.

– Når kvalifiserte personar uttaler seg om dette, så vert folket påverka av det. Eg håpar mange har solidaritet med risikogruppene – altså den yngre generasjonen, som er mest utsett. Vanlegvis er det jo dei eldste som er mest utsett når det kjem til influensa, forklarar Onarheim.

– Friske lyt venta
Då Sunnhordland.no vitja Stord sjukehus laurdag føremiddag, var køen inn til Steinsland sitt vaksinekontor relativt lang. Det tok om lag 25 minuttar å stå i kø. Personellet lyt vente i nye 25 minuttar etter vaksinasjonen for å sjå om kroppen reagerer negativt mot vaksinen.

– Eg meiner dette har gått effektivt for seg, seier Bjarte Wilhelmsen.

Også sundag vil det vera vaksinestasjon på sjukehusa frå klokka 13.00 til 16.00. Mot slutten av veka set kommunen i gang med å vaksinera risikogrupper.

Kommunelege i Stord, Lars Helge Sørheim, oppmodar folk som i utgangspunktet er friske om å venta med å oppsøkja vaksinekontora på helsestasjonane, slik at risikogruppa får vaksinen først.

Les heile saka i Sunnhordland: Vaksinerer heile helga