Hopp til hovedinnhold
AW 101, 330 skvadronens nye redningshelikopter, lander på akuttbygget til St. Olavs hospital. Foto: Henrik Ryslett Hansen


Nye redningshelikopter blir sett i endeleg drift tysdag

Oppgåva med å plukke ut Sea Kings erstattar var ein av dei aller første sakene til Solberg-regjeringa hausten 2013. Tysdag overtek redningshelikoptera AW101.

Det har vore ein lang veg fram til markeringa på redningsbasen på Sola 1. september, der statsminister Erna Solberg (H), justis- og beredskapsminister Monica Mæland (H) og forsvarsminister Frank Bakke-Jensen (H) vil delta i ein seremoni for å markere det som blir kalla ein milepæl for norsk redningsteneste, siterer Møre NTB.

Men det blir ingen brå overgang. Sea King skal gradvis fasast ut fram til midten av 2023 etter 47 års teneste, der dei siste helikoptera vart kjøpt inn i 1996.

Best i verda

Produsenten Leonardo, tidlegare AgustaWestland, frå Italia, er i alle fall superfornøgd, trass forseinkingar, og har skrytt av at den norske versjonen AW101-612 er «det beste redningshelikopteret i verda – med god margin».

– Dei nye redningshelikoptera vil ha langt betre rekkjevidd, større fart og betre evne til å operere i dårleg vêr enn Sea King-helikoptera i dag. Det betyr større tryggleik for folk på sjøen, langs kysten og i avsidesliggjande område over heile landet. Den norske redningstenesta vil derfor få eit betydeleg løft – både over hav og land, skriv i Justisdepartementet i ein e-post til NTB.

Seint ute

Eigentleg skulle alle 330-skvadronar hatt AW101 per no, men på grunn av forseinking etter forseinking er leveringa to og eit halvt år forseinka samanlikna med løftet til dåverande justis- og beredskapsminister Anders Anundsen (Frp) i mars 2016.