Kvalitetspris til akuttmedisin og intensivmedisin

Seksjonsoverlege og amanuensis Guttorm Brattebø ved Akuttmedisinsk seksjon og professor dr. med. Hans Flaatten ved Intensivmedisinsk seksjon er tildelt kvalitetsprisen på den fjerde kvalitetskonferansen i Helse Vest. Begge legane høyrer til ved Haukeland universitetssjukehus, Helse Bergenskriv dei i en pressemelding på sine nettsider.

Brattebø er heidra med prisen på grunn av arbeidet med det såkalla BEST-prosjektet, som han var med å starte i 1996. BEST står for ”Bedre og systematisk teamtrening” og målet for prosjektet er blant anna teamsamarbeid, kommunikasjon og leiing av team. I prosjektet er det utvikla ein kursmodell for tverrfagleg trening for personar som høyrer til akutt- og traumeteam ved dei ulike sjukehusa.

- Det er svært hyggeleg å få denne prisen og dermed ei viktig verdsetjing av det arbeidet som er gjort i BEST-prosjektet. Vi har arbeidd målretta med BEST i snart 15 år og det er innarbeidd i den daglege drifta. I Noreg er det no meir enn 5000 personar som har delteke på kurs i regi av BEST, og flest av dei i Helse Vest. Til sjuande og sist er det pasientane som skal nyte godt av at helsepersonell har lært seg å samarbeide betre og gjere dei rette tinga i rett rekkefølgje og på rett måte, når ulukker eller akutte hendingar er eit faktum, seier Guttorm Brattebø.

Hans Flaatten fekk den andre prisen, som i følgje grunngivinga til komiteen er gitt fordi han gjennom ei årrekkje har stått sentralt i forbetringsarbeidet i Helse Vest. Engasjementet hans involverer alle dei fire temaa for kvalitetssatsinga i Helse Vest: Kunnskap, pasientfokus, pasienttryggleik og resultatmålingar.

Les meir hjå Helse Bergen