Same dag som Ragnar Thorseth gjorde det kjend at han vil ro til Shetland, kjem han med beisk kritikk av redningsoperasjonen som vart sett i gang då fritidsbåten hans nyleg sleit seg, ifølge Herøynytt.
– Eg sa til Florø radio at eg trong ein slepebåt for å trekke båten min av grunn, fortel Ragnar Thorseth.
Hovudredningssentralen for Sør-Norge svarte med å beordre ut to helikopter, eit Sea King og eit ambulansehelikopter.
Den erfarne kapteinen og eventyraren er forbanna over alt oppstyret som vart. Eit Sea King-helikopter kom frå Florø, men returnerte med ein gong. Ambulansehelikopteret frå Ålesund landa, utan at det vart behov for det.
– Det går på yrkesstoltheita laus. I dag er eg skamfull ute blant folk, at eg skulle vere årsaka til dette her, seier eventyraren gjennom eit langt liv.
– Florø radio spurde meg om eg trong helikopter, og eg sa nei det er heilt unødvendig, eg treng ein slepebåt. Eg fortalde at eg sat i ein varm sovepose, med åtte kilowatt varme i båten, men at båten har gått på grunn og at den ville bli fylt med vatn om den ikkje vart taua av, fortel Ragnar Thorseth.

På nære nippet

At han er i live er likevel ikkje sjølvsagt. Etter meir enn ein halvtime i sjøen, og etterpå nesten ein halvtime med våte klede i den kraftige vinden, var det truleg ikkje store marginane att for Ragnar Thorseth. Slik opplevde han det sjølv.
– Eg følte at det var varmare å vere i sjøen enn å ha overkroppen over vatn. – Etterpå har eg diskutert det med ein kamerat. Han lærte av ein lege at dette er augneblinken før du mister bevisstheita.
Les meir om saka hjå Herøynytt