Dei raude heltane
22. juli 2011 utsette sivile seg for større risiko enn redningspersonell, og enkelte sat att med ei svekka tillit til dei uniformerte. No skal nye retningslinjer gje brann og ambulansemannskap større mulegheiter til å gripe inn i valds situasjonar.
Ambulanseforum nr. 1 2015
Bjørn Kasper Ilaug hadde alltid hatt ei sterk tillit til ambulansearbeidarar. Kvar gong han var i huset sitt på Gaustad i Oslo og høyrde ambulansehelikopter buldre over hustaket, tenkte han at «der er det eit menneske som treng hjelp».
Han følte seg privilegert over å bu i eit land der han kunne vente rask hjelp, om noko skulle skje.
Ein sommardag i 2011 skulle Ilaug si tillit til nødetatane bli dramatisk svekka.
Han var på hytta på Storøya i nærleiken av Utøya og hadde hatt besøk av ein kompis på føremiddagen. Det høljregna, og dei hadde sete inne og sett Tour de France på TV.