Ny ambulansejet har landa i Noreg

Første nye ambulansejet av sitt slag har komme til Noreg. Flyet kjem rett frå fabrikken i USA og skal styrke beredskapen i den norske luftambulansetenesta, skriv Nordre.

– Dette er eit fantastisk fly som med si fart, rekkevidd og kapasitet raskt kan bringe opp til fire behandlarar og mykje medisinskteknisk utstyr til alle kantar av landet, inkludert Svalbard, seier Marius Hansen, dagleg leiar i Babcock Scandinavian AirAmbulance, i ei pressemelding.

Det nye jetflyet, ein C680A Latitude, landa på Gardermoen onsdag. Han skal styrke beredskapen i den norske luftambulansetenesta frå 1. juli i år.

– Det er gledeleg at det første nye flyet til luftambulansetenesta no har komme til Noreg, seier administrerande direktør Øyvind Juell i Luftambulansetjenesten HF.

Flyet har ei besetning på minimum to pilotar og ein flysjukepleiar, har to båreplassar og fire sitjeplassar. Det skal drivast og blir operert av Babcock Scandinavian AirAmbulance på vegner av Luftambulansetjenesten HF og dei fire regionale helseføretaka som eig tenesta.

Ved sida av jeten skal Babcock Scandinavian AirAmbulance òg drifte og operere ti nye Beech 250 propellfly. Desse flya er ein oppgradert versjon av flya som blir brukte i tenesta i dag, og det første av desse flya er venta til Noreg i slutten av veka.

Les meir om saka hjå Nordre

Leave a Reply

Din e-postadresse vil ikke bli publisert. Obligatoriske felt er merket med *

*

Dette nettstedet bruker Akismet for å redusere spam. Lær om hvordan dine kommentar-data prosesseres.