Ørjan Jensen: – Vanskeleg når vi ikkje kan hjelpe meir
Ambulansearbeidar Ørjan Jensen fortel om det vanskelegaste med jobben skriv avisa Firda.
For tida kan du sjå dokumentarserien «Ambulansen» på TV-kanalen Fem, der vi følger ambulansearbeidarane frå Helse Bergen.
– Det beste med serien er at vi får vist fram kva vi faktisk gjer, seier Monica Hauge.
Saman med Jensen er ho ei av dei som figurerer på TV-skjermen kvar veke.
60.000 utrykkingar
For ordens skyld. Det heiter ikkje ambulansesjåførar.
Arbeidet som vert utført av dei som rykker ut med ambulansane vi så ofte ser i bybildet, er så uendeleg mykje meir.
– Kva er det vanskelegaste med jobben?
– Det å rykke ut til ei ulykke der nokon er skada, er greitt å takle, for då veit vi kva vi gjer og får gjort det vi kan. Det verste er å hente ei mor på 30 år for å køyre ho heim for å døy med barna sine. Det er utruleg vanskeleg. For der finst det inga løysning, seier Ørjan Jensen.
60.000 oppdrag i året fortel alt om kor hektisk kvardagen er for ambulansepersonalet i Helse Bergen. TV-serien konsentrerer seg om stasjonen i sentrum og i Fana.
Med 24-timars bemanning arbeider rundt 60 ambulansearbeidarar døgnet rundt for å hjelpe menneske.
Ville seie nei
Monica Hauge hadde eigentleg tenkt å seie nei til å vere ein del av TV-serien.
– Vi fekk ein e-post frå Helse Bergen om å vere med på dette, og eg hadde bestemt meg for å ikkje vere med. Men sjefen vår, Otto Hansen, syntest prosjektet var så bra at han «trua» meg med, seier Hauge og smiler.
– Hehe, ja. Han sa at han ikkje gjekk på ferie før eg hadde takka ja, seier Hauge.
Ho er glad ho blei med.
– Det var ikkje så mange som melde seg frivillig til å vere med i serien, men produksjonsselskapet ville gjere dette til ein serie som viste kva vi faktisk gjer, og då var det viktig å få folk med på laget, seier Otto Hansen.